Nangandam na karon og legal briefer ang Department of Justice ug ang Office of the Solicitor General alang kang Presidente Ferdinand Marcos Jr.
Taliwala kini sa gipaabot nga pagluwat og warrant sa International Criminal Court batok ni kanhi Presidente Rodrigo Duterte ug ubang mga kauban bisan unsang orasa.
Matod ni Justice Asec. Mico Clavano, ang gituhoang legal briefer sa ilang ahensya tumong nga mahatagan og opsyon si Presidente Marcos Jr. nga mahimo niyang pilion kung matuman ang warrant sa ICC.
Dugang pa, nga sa pagkakaron nagpabiling confidential ang unod sa briefer apan kabahin niini mao ang mga pros and cons sa Pilipinas sa pag-apil og balik sa Rome Statute.
Hinuon, subling gipasiugda sa gobyerno nga bisan pa niini nagpabilin gihapon ang administrasyon ni Marcos Jr. nga dili ilhon ang ICC tungod kay aduna pay igong kapasidad ang kagamhanan sa atong nasud nga patubagon si bisan kinsa nga sad-an, bisan ang mga kanhi opisyal sa gobyerno.
Kon kahinumdoman, unang niingon si kanhi Senador Antonio Trillanes IV nga base sa iyang kasaligang Source, posibleng moluwat na ang ICC og warrant of arrest batok kang Duterte sa mga buwan sa Hunyo o Hulyo sa kasamtangang tuig.
