Niatubang sa buhatan sa National Bureau of Investigation sa Quezon City ang giingong doppelganger ni dismissed Bamban, Tarlac Mayor Alice Guo.
Niabot kini sa NBI gahapon sa hapon aron atubangon ang mga pasangil batok kaniya nga mihatag og kasamok sa mga awtoridad.
Sa dihang miatubang si Salazar sa NBI, nagsul-ob kini og light green nga t-shirt, jeans, face mask, naka-glasses ug iyang buhok nga susama kang Alice Guo kaniadtong wala pa kini nagtago-tago.
Kahinumduman nga unang nahinabi ni NBI assistant director for investigation service Lito Magno si Alice Guo human kini madakpi sa Indonesia ug gipakita sa opisyal sa NBI si Guo og hulagway sa iyang cellphone ug gipangutana kon siya ba ang babaye sa litrato, apan ang kanhi mayor mihimakak niini ug miingon nga iyang mga kawani ang maong mga indibidwal.
Una na usab nga gitug-an sa NBI nga posibleng gigamit ang katabang ni Guo nga giilang si Catherine Salazar nga decoy o nagpakaaron-ingnon nga si Alice Guo aron malibog ang mga otoridad sa ilang pagpangita dihang nagtago-tago ang kanhi mayor niadtong Hulyo.
