Walay puas ang pagsuway nga giatubang karon sa Sugbo, ilabi na sa hisgutanan kabahin sa basura, maayo nalang nga niadtong Sabado, adunay nakab-ot nga short term option ang buhatan sa Department of Public Service ug mao ang adtu ilabay una ang tanang basura sa ASEAN Energy Sytems sa Consolacion, Cebu.
Apan, sa dihang na implemantar na ang maong lakang, naglinya na ang mga gargabe truck nga kargado’g basura, hinungdan nga karong adlawa, Enero 12, mangayo og tabang ang buhatan sa DPS ngadto kang Consolacion City Mayor Nene Alegado, aron masugdan na ang meeting ug hingpit nga na malabay ang naglinyang mga basura sa maong lugar.
Mao kini ang nahimong pamahayag ni John Paul Galasque ang Department of Public Service head (DPS) atol sa ekslusibong pakighinabi sa Bombo Radyo Cebu Newsteam kaniya, diin iyang gidugang nga makigtagbo siya kang Mayor Alegado aron makasugod nang ipanglabay ang mga basura gikan sa nagkalain-laing barangay sa Sugbo ug usab sa basurang nakolekta sa sakop sa DPS.
Gihisgutan usab ni Galasque ang mga taho nga nadawat niya gikan sa mga loaders ug drivers sa mga garbage truck, nakalinya na sila ug andam na mosulod sa pasilidad, apan adunay gitoohang indibidwal nga nibabag ug dili sila tugotang makasulod sa pasilidad, ug mao kini ang inisyal nilang taho nga nadawat.
Busa, nireport siya sa City Administrator ug nakadesisyon sila nga mag courtesy visit sila sa Consolacion.
Gikabutyag usab ni Galasque nga basi sa iyahang nasayran, ang kining ASEAN Energy Systems usa kini nga pribadong pasilidad.
Sa pikas bahin, iyahang gikompirmar nga ang tanang basura sa Dakbayan sa Sugbo kasamtangang natanggong, gani iyang naasoy nga aduna nay mga kapitan nga nanawag niya ug nagsusi kung kanus-a sila makalabay sa ilang nakolektang basura.
Agi’g tubag, iyaha unang gipastandby ug miingun nga aduna nay luna nga kalabayan apan, anaa lay nahimamat nga problema.
Busa, nanghinaot si Galasque nga ang maong problema nga gisagubang karon sa Sugbo, aduna nay solusyon.
Gitataw usab ni Galasque nga ugaling dili gihapon maimplementar ang kasamtangang inisyatiba nila, aduna nay napunting nga laing landfill si Cebu City Mayor Nestor Archival, apan dili pa mamahimong ibutyag sa karon, kay gikinahanglan pa kini nilang pagatun-an pag-ayo.
