CENTRAL VISAYAS- Magpatuman og bag-ong traffic scheme ang Department of Public Works and Highways – Central Visayas (DPWH-7) sa dalan nga nagsubay sa Marcelo Fernan Bridge (2nd Mactan-Mandaue Bridge) agi og pag-accommodate sa rehabilitation works sa maong taytayan.
Nagsugod ang maong bag-ong traffic scheme niadtong Miyerkules, Septiyembre 10 gikan sa alas 11 sa gabii hangtod sa alas 5 sa buntag kada adlaw hangtod sa matapos kini.
Niining higayona, ang mga motorista musubay sa northbound lane (gikan sa Lapu-Lapu City hangtod sa Mandaue City) kay temporaryong ipasirado og tungaan niini ang nahabiling duha ka southbound lanes (gikan sa Mandaue City hangtod sa Lapu-Lapu City) diin ipatuman ang zipper lane scheme.
Giabisohan ang mga motoristang muadto sa Mandaue gikan sa Lapu-Lapu nga mamahimong alternatibong rota ang Serging Osmeña Jr. Bridge (Old Mactan-Mandaue Bridge) atol sa panahon sa implementasyon sa rehabilitasyon sa taytayan.
Gikatakdan kini matapos sa buwan sa Oktubre 2025 diin ang trabahuon kay mao ang retrofitting sa deck slab sa maong taytayan.
