CEBU CITY – (Update) Giisip nga bayani ang driver sa elf type truck nga si Axel Jayme Abrasaldo nga mibangga sa concrete barrier sa Trancentral Highway Sitio Z, Brgy Cansomoroy Balamban Cebu diin gikaangol kini sa 31 ka mga batan-on.
Kini tungod kay matud pa kung naratol ang driver ug wala kini makahuna-huna nga ibangga nalang sa concrete barrier ang sakyanan nga nawad-an na og break, mulahos gyud kini sa pangpang ug wala gyuy posible nga makasurvive.
Matud sa Deputy Officer sa Balamban PS nga si SPO4 Revelito Tariki nga maayo nalang kay nakahuna-huna ang driver og bangga sa railings mao nga luwas ra ang 31 ka mga sakay sa truck.
Una niini, nadawat nila ang alarma natayming usab nga nagroving sila sa maong dapit.
Pag-abot nila sa area nakita nila ang mga sakay nga nagkatag na sa dalan ug mga samdan.
Nasayran nga ang maong barrier gihimo tungod sa pipila na usab ka mga disgrasya nga nahitabo sa naasoy nga dapit diin wala gyuy naluwas kay nahagbong man sa pangpang.
Subay niini, gitambagan ni Tariki ang mga driver nga mag-engine break lang og dili magsige tamak sa break sa sakyanan sa dulhogon nga 8 km ang kalay-on sa karsada kay mao kini ang hinungdan sa disgrasya.
Gihimug-atan niya nga kinahanglan gyud nga mupokos sa dalan para makalikay sa mga bisan unsang road accidents.
