TALISAY CITY CEBU-Natingkagol sa prisuhan ang usa ka 20-anyos nga waiter human kini magmaniho nga hubog ug nakalambigit sa usa ka aksidente sa dalan N. Bacalso Avenue, Barangay Lawaan I, Talisay City pasado alas-7 sa buntag.
Base sa imbestigasyon, misulay og overtake sa usa ka de-pasaherong bus ang maong drayber sa motor apan aksidente hinuon kining nakadasmag og usa ka nagbiseklita.
Tungod sa kakusog sa impak, nalabay ang back rider sa motor kinsa dimalas nga natapsingan pa ang tiil sa ligid sa bus, samtang ang nagbiseklita nakaangkon usab og mga pangos sa lawas apan anaa na sa luwas nga kahimtang.
Gipaubos dayon sa breath analyzer test sa LTO-7 ni Atty. Vince Santiago, ang Head sa Operations, ang drayber diin didto nakumpirma nga positibo kini nga nakainom og ilimnong makahubog.
Tungod niini, pasakaan na og tukmang kaso ang maong waiter samtang ang CT-TODA hugot nga nagpahinumdom sa tanang motorista nga likayan gayod ang pagmaniho kon nakainom aron malikay sa disgrasya.
