CEBU – Giangkon sa Cebu City Police Office (CCPO) nga naglisod ang ilahang buhatan sa pag-ila sa mga piniriso nga dunay koneksiyon sa ilegal nga drugas gawas sa prisohan.
Kini human ang usa ka drug suspect nga nasikop sa kapulisan sa dakbayan sa Sugbo niadtong Domingo, Marso 5, 2022 nagdumili sa pagbutyag sa tinuod nga ngalan sa iyang tinubdan sa ilegal nga drugas nga gikan sa sulod sa Cebu City jail.
Si Randy Cruda Aranduque, 35, high value individual-regional level sa Villa Zacate, Barangay Basak Pardo, dakbayan sa Sugbo niila lang sa usa ka “Opaw” nga iyang supplier sa drugas dihang nadakpan atol sa buy-bust operation niadtong Domingo sa alas 5 sa hapon humaan nakuhaan kini og kapin sa P1 milyones nga kantidad sa gituohang shabu.
Kasamtangan na nga gitanggong si Aranduque sa Pardo Police Station.
Gibutyag ni Police Lieutenant Colonel Wilbert Parilla, deputy director for operations sa CCPO, nga si Aranduque maoy sinaligan ni Opaw, kinsa natanggong karon sa Cebu City Jail, tungod sa iyang supply sa ilegal nga drugas.
Gumikan niini, makig-alayon ang CCPO sa mga personnel sa Bureau of Jail Management and Penology (BJMP) ug Department of Interior and Local Government aron matubag ang maong problema.
Matud pa ni Parilla nga dakong hagit alang kanila ang pagsulbad sa problema sa drugas sanglit kasagaran sa mga drug suspect nga ilang nasikop miila sa ilang supplier og drugas sulod sa prisohan pinaagi lang sa ilang mga angga.
Nihimo na og lakang ang BJMP aron masumpo ang ilegal nga drugas sulod sa prisohan pinaagi sa pagsakmit sa mga cellphone sa mga piniriso tungod sa ilang abilidad sa pagpakigkomunikar sa gawas.
Nipahigayon usab kini og internal cleansing sa mga personahe sa city jail aron mapugngan ang pagpalusot sa mga cellular phone sulod sa prisohan bugti sa dakong bayronon.
