Gikabutyag sa Department of Trade and Industry (DTI) nga walay pagsaka sa presyo sa mga batakang panginahanglan ug mga pangunang palaliton hangtod sa Mayo 10, 2026.
Diin, naglakip kini sa mga produktong de-lata sama sa sardinas, processed milk, pan, kape, locally manufactured instant noodles, bottled water, sabon panglaba, kandila, asin, canned meat, condiments, ug toilet soap,ug kining tanan ubos sa (SRP).
Subay niini, giklaro usab ni DTI Secretary Ma. Cristina Roque nga wala sila maglaop adunay kakulangon sa suplay sa umaabot nga mga semana, busa dili kinahanglan ang panic buying.
Nipasalig usab ang maong ahensya nga hugot ang ilang pagmonitor sa mga merkado aron masiguro nga ang mga batakang produkto anaa ug ang mga presyo magpabilin nga barato.
Ingun man nga ang ahensya miingon nga kini nakig-alayon na sa mga tiggama ug mga retailer aron malikayan ang pagpangwarta ug wala gitugot nga pagsaka sa presyo, ug giawhag ang mga konsumidor nga ireport ang mga tindahan nga namaligya og labaw sa SRP aron masiguro nga ang patas nga presyo gipatuman.
Samtang, gitino ni Roque nga ang maong mga lakang nahiuyon sa direktiba ni Presidente Ferdinand R. Marcos Jr. aron mapanalipdan ang mga konsumidor taliwala sa nagpadayon nga panagbangi sa Middle East.
