Gipahibalo sa Department of Trade and Industry (DTI) nga padalion niini ang paghatag og suporta gikan sa gobyerno alang sa USD2 bilyones nga pasalig sa pamuhunan gikan sa American private equity firm, nga gitumong alang sa nagkalain-laing proyekto sa enerhiya ug imprastraktura sa nasud.
Matod sa ahensya, aktibo nilang gisusi ang pag-uswag sa mga proyekto sa kompanya lakip ang mga pasilidad sa fuel storage, mga pipeline, ug cold storage aron masiguro nga mahatag ang tukma nga tabang gikan sa gobyerno.
Nagplano kini nga mamuhunan og dugang USD1 bilyones sulod sa duha ngadto sa tulo ka tuig. Kini dugang pa sa kapin sa USD1 bilyones nga namuhunan na niini sa Pilipinas, nga nagdala sa kinatibuk-ang kantidad sa ilang pasalig ngadto sa USD2 bilyones.
Nakigtagbo si Roque kang Kunal Agarwal, ang Managing Director sa I Squared Capital, ug kang Nishant D’Souza, ang Operating Advisor niini, atol sa pagbisita ni Presidente Ferdinand R. Marcos Jr. sa Singapore niadtong Oktubre 10.
Atol sa maong panagtagbo, gitaho sa kompanya ang pag-uswag sa pagtukod og mga bag-ong pasilidad sa pagtipig og sugnod sa Batangas ug Davao pinaagi sa ilang subsidiary nga Philippine Coastal Storage and Pipeline Corp. Ang maong kompanya nagtipig usab og kapin sa usa ka milyon ka bariles sa estratehikong reserba sa sugnod alang sa Philippine National Oil Co. (PNOC).
Mipirma usab ang kompanya og duha ka Memorandum of Understanding uban sa Bases Conversion and Development Authority (BCDA) alang sa gisugyot nga fuel pipeline tali sa Subic ug Clark, ingon man usa ka potensyal nga proyekto sa Subic Bay nga mag-convert sa liquefied natural gas ngadto sa enerhiya (kuryente).
Gipaambit usab nila ang ilang mga plano nga palapdan ang Royale Cold Storage sa Cebu ug Davao.
Sa miaging tuig, gipahigayon sa maong American private equity firm ang groundbreaking alang sa 1.5-ektaryang pagpalapad sa Royale Cold Storage (RCS) sa Plaridel, Bulacan. Sa pagkakaron, naghatag kini og trabaho sa kapin sa 2,500 ka mga tawo sa Pilipinas.
Gipahayag usab sa I Squared Capital ang ilang interes sa pagsuhid sa mga oportunidad sa natad sa mga tore sa telekomunikasyon, mga data center, ug mga ospital. Sa laing bahin, gipunting ni Roque ang healthcare, teknolohiya sa agrikultura, logistika, ingon man ang enerhiya ug konektibidad isip mga prayoridad nga sektor diin ang dugang nga puhunan makasuporta sa paglambo sa nasud.
