Napun-an pa ang mga unit sa bus ubos sa Libreng Sakay program sa Kagamhanang Dakbayan sa Mandaue human milarga kagahapong adlawa sa Martes, Abril 7 ang duha ka electric-type vehicle sa kadalanan sa syudad.
Ang duha ka units kay puros mga PWD-friendly aron sayon ang pagsakay-naog sa mga pasahero nga manghimulos sa libreng sakay.
Gani, personal nga gisusi ni Mandaue City Mayor Thadeo “Jonkie” Ouano ug mga konsehales sa syudad ang debut trip sa duha ka bag-ong units nga mamahimong maka-akomodar og kapin 20 ka pasahero sa mga giserbisyohang routa niini.
Aduna sab real-time monitoring camera nga naka built-in sa maong mga sakyanan aron masiguro ang kaluwasan sa mga pasahero matag byahe sa bus.
Magbyahe matag Lunes hangtod Biyernes gawas nalang sa mga holiday ang maong libreng sakay bus nga magsubay sa routang Centro – AC Cortes Avenue.
Sugyot sa kagamhanang dakbayan nga magdugang pa og laing upat ka units para sa maong programa nga ipakatap sa ubang mga routa aron pag-abag sa mga commuters karong panahon nga ga-krisis sa produktong petrolyo sa sobra kaduha ka pilo nang pagsaka sa presyo niini.
