CEBU CITY – Gibutyag sa medico legal officer sa National Bureau of Investigation (NBI) – VII posibleng nagagikan sa usa sa mga anak ni Lourdes Silawan, ang inahan sa dalagita kinsa nga gilaplapan ug gipatay sa Lapu-Lapu City, ang dugo nga anaa sa sapatos sa 18 anyos nga suspek.
Matud ni Dr. Rene Cam sa NBI-7 , nagmatch ang lama sa dugo sa sapatos ni alyas “Jun”, kinsang ex-boyfriend ni Christine Lee Silawan, sa DNA sample nga nakuha gikan sa buccal swab sa ginikanan sa biktima.
Hinoon, wala direkta giingon ni Cam kung kang Christine ba gayud ang dugo nga naa sa sapataos sa suspek.
Samtang, negatibo usab ang resulta sa giingong lama sa dugo nga nakuha sa t-shirt sa akusado diin, matud pa, dili dugo ang maong mga lama.
Sa laing bahin, dili pa hingpit nga gikalipay ni Lourdes Silawan ang resulta sa DNA test nga nakuha sa NBI medico legal.
Matud ni Lourdes nga ‘medyo’ nalipay siya apan dili pa kini matud pa igo tungod kay gusto niya nga makuha ang tinood nga hustisya para sa anak. Makuha niya kini kung mahukman na ang akusado.
Kombinsido na ang inahan human nga nakuha ang resulta gikan sa sapatos sa akusado apan magpaabot na lang kini sa hukom gikan sa korte.
Gi-angkon usab ni Lourdes nga nahasol siya sa resulta nga nag-usab-usab apan misalig gihapon kini sa NBI nga maoy gitahasan sa maong imbestigasyon.
Gani mipaambit pa ang inahan nga nagpadamgo kaniya ang iyang anak nga si Christine nga naghilak samtang nangayo kaniya og pakitabang.
Hangtud matud pa karon dili pa niya madawat ang brutal nga kamatayon sa iyang anak. (FDP/GN)
