Nagdagsa gihapon ang mga bayanihong donor sa tagsa-tagsa ka mga bililhong dugo niini, bisan paman nga kutob ra sa alas 5:00 sa hapon ang gipahigyon sa Bombo Radyo Cebu gahapong adlawa, Nobyembre 15, sa SM City Cebu.
Sa maong kalihokan, nagkahiusa ang lain-laing ahensya ug organisasyon aron masuportahan ang usa ka malinawon nga misyon, ang pagluwas og mga kinabuhi pinaagi sa pagdonar og dugo.
Bisan pa man sa 6.9-magnitude nga linog ug sa grabe nga kadaut sa Bagyong Tino nga nikutlo sa kapin 200 ka nangamatay, nagpabilin nga lig-on ug mapinabangon ang mga Cebuano.
Nagpamatuod kini nga bisan taliwala sa trahedya, ang panaghiusa ug kasingkasing sa pagka-Pilipino dili gayud matarug. Karon, makita kini sa ilang kusganong kolektibong partisipasyon sa maong bloodletting activity.
Subay niini, kapin gatosan ka mga personahe nga nisuporta ug mitabang sa pagdumala sa proseso sa pagdonar, nga pinangulohan sa Philippine Red Cross Cebu Chapter, gisundan sa BFP, PNP, ug ang dedikadong mga volunteers sa Red Cross.
Nunot niini, ekslusibong nakuha sa Bombo Radyo Cebu team ang habig ni Keen Lester Espanto, ang Quality Assurance Officer sa Red Cross Cebu Chapter, diin siya, mapasalamaton sa Bombo Radyo Cebu, Bombo Radyo Philippines Foundation Inc., Star FM, ug sa Philippine Red Cross sa nitumaw nga lig-ong kooperasyon niini aron hingpit nga magmalampuson ang maong kalihokan.
Giila ni Espanto ang lig-on nga koordinasyon ug ang oportunidad nga nagpadayon sa kalampusan sa kampanya, bisan pa sa sunod-sunod nga kalamidad nga nasinati sa rehiyon.
