CEBU CITY-Nagpahigayon og managlahi nga anti-drug operations ang anti-narcotics agents gikan sa Philippine Drug Enforcement Agency in Central Visayas (PDEA-7), Regional Special Enforcement Team, ug ang Pari-an Police Station diin hinungdan sa pagkasikop sa duha ka gidudahang drug pushers adlaw sa Lunes, Agosto 7, 2023.
Ang unang buy-bust operation gipahigayon sa Barangay Day-as alas 7:23 sa gabii ug nadakpan ang 64-anyos nga lalaki sa dalan sa Sikatuna, Barangay Day-as tungod sa giingong pagpamaligya og ilegal nga drogas.
Nasakmit sa mga enforcer ang tulo ka pakete sa ilegal nga drogas nga gituohang shabu gikan sa suspek nga si Peter Boja Boholst, nga motimbang og 20 ka gramos, ug adunay gibana-bana nga mobalor sa P136,000.
Matud pa sa Information Officer sa PDEA-7 nga si Leia Alcantara, niingon nga duha ka bulan nilang gipanid-an ang mga kalihokan ni Boholst usa kini nasikop.
Base sa imbistigasyon sa kapulisan, nga mokabat sa 25 ngadto sa 30 ka gramo nga shabu ang ma-dispose ni Boholst matag semana.
Subay niini, upat ka oras ang nilabay, nasikop usab sa anti-drug unit sa Abellana Police Station ang laing gidudahang drug pusher sa Sitio Lower Kayawan, Barangay Sambag 2.
Giila ang suspek nga si Junnel Gabayan Beleña, 35-anyos kinsang gidudahan nga ‘street level individual’ drug pusher sa dakbayan sa Sugbo.
Dili mominus sa lima ka gagmay nga pakete sa shabu nga adunay kinatibuk-ang kantidad nga P6,256 ang nasakmit kang Baleña.
