CEBU – Nasikop sa kapulisan sa dakbayan sa Talisay ang duha ka lalaki tungod sa paghupot og 30.25 gramos sa gituohang shabu nga mobalor og P205,700 atol sa buy-bust operation sa Sitio Cainta, Barangay Pooc, Sabado sa gabii, Disyembre 10.
Giila sa kapolisan ang mga suspetsado nga sila si Ricardo Piadopo, 33, ug ang giingong kaipon niini nga si Marson Plazo, 28, ang duha ka mga suspek pulos taga Barangay Pooc.
Matud pa ni Police Lieutenant Colonel Randy Caballes, hepe sa Talisay City Police Station, nga si Piadopo mamaligya og shabu sa iyang mga kauban sa trabaho sa usa ka bodega sa bugas humay sa ilang siyudad.
Siya ang nagdumala sa operasyon sa mga porter sa bodega ug maoy gitahasan sa paghatag sa ilang sweldo.
Nasayran nga si Piadopo mokuha sa iyang supply sa shabu pinaagi sa usa ka piniriso nga natanggong sa Mandaue City District Jail.
