LAPU-LAPU CITY,CEBU- Miulbo ang duha ka managlahing sunog sa Dakbayan sa Lapu-Lapu, kung diin una nga mitumaw sa Barangay Basak ug gisundan sa Barangay Canjulao, karong adlawa, Mayo 30, 2025.
Unang natala nga sunog sa Sitio Iba, Barangay Basak, apan sa pag-abot sa daghang mga bombero sa sunog sa Basak, niulbo ang laing sunog sa Sitio Lubi, Barangay Canjulao.
Hinungdan, nga ang pipila sa mga bombero gikan sa mga silingang siyudad nitabanag aron sa pagresponde sa sunog sa Canjulao.
Sa pakighinabi sa Bombo Newsteam, kang Hon. Rufo Bering, ang Kapitan sa Brgy. Canjulao, dakbayan sa Lapu-Lapu, nikompirmar nga nagsugod ang kalayo sa balay ni Manuel Ymbong, alyas Boyko, usa ka Mentally ill, dihang nagdaob kini sa mga basura nga adunay gas.
Mikuyanap kini sa mga silingang kabalayan, ug nasunog ang 24 ka mga balay nga totally damaged, diin 141 ka indibidwal ang apektado.
Dugang pa niya nga posibleng mosaka ang ihap tungod kay partial pa kini ug wala pa nila makompleto ang assessment sa mga biktima.
Hinuon, ang tanang apektado temporaryong nagpuyo sa Canjulao Elementary Gym, sulod sa 15 ka adlaw.
Gawas pa niana, mohatag usab ang Gobyerno og Rental Subsidy, sulod sa usa ka bulan, aron matabangan sila sa pagsugod human sila masunogan.
Sa inisyal nga taho, alas 10:40 sa buntag nakontrolar na ang sunog sa Basak.
Mga alas 10:40 sa buntag niabot ang mga ni-divert nga kabomberohan sa sunog sa Canjulao diin gisumpay-sumpay nila ang ilang mga hose tungod kay dili na makalusot ang mga firetruck sa fire scene didto tungod sa hagip-ot nga mga dalan, nga nahimong hinungdan nga nalangay sila sa pagpalong sa Kalayo.
