Niabot na sa dul-an 4 milyones ka indibidwal ang gidaghanon sa mga tawo nga naapektuhan sa sunod-sunod nga mga bagyo nga miigo sa nasud basi sa datus sa National Disaster Risk Reduction and Management Council (NDRRMC).
Diin ang rehiyon sa Bicol kay nakatala sa labing taas nga ihap sa mga apektadong indibidwal nga kapin sa 1.9 milyon ug kini nga rehiyon maoy labing grabeng naapektuhan sa bagyong ‘Kristine’ ug bagyong ‘Leon’.
Ikaduha ang Cagayan Valley nga adunay 809,637 ka indibidwal nga apektado. Kahinumduman nga ni-landfall sa Cagayan ang bagyong ‘Ofel’.
Samtang sa Eastern Visayas adunay 408,593 ka indibidwal ang apektado samtang sa Central Luzon adunay 331,531 ka indibidwal.
Sa pagkakaron, anaa pa sa 244,492 ka mga tawo ang nagpabilin sa mga evacuation center sa tibuok nasud.
Sa pinakaulahing datus gikan sa ahensya, 3 ka sunodsunod nga bagyo ang nagbilin og 12 ka tawo nga namatay gikan sa Cagayan valley, Central Luzon ug Cordillera Administrative Region (CAR).
