Mokabat sa dul-an P7-million nga kantidad sa shabu ang nasakmit sa mga sakop sa PNP atol sa managlahing mga operasyon kagahapon sa dakbayan sa Mandaue ug Lapu-Lapu.
Una, nakuha sa mga sakop sa City Intelligence Branch ug Philippine Drug Enforcement Agency (PDEA)-7 ang kapin P4-milyones nga shabu sa usa ka operasyon sa Sitio Soong, Brgy. Mactan, dakbayan sa Lapu-Lapu.
Nadakpan sa maong operasyon ang High Value Target nga si Cielo Regner ug nagpuyo kini sa Brgy. Cogon-Ramos, dakbayan sa Sugbo ug nakuhaan kini og 625 gramos sa shabu diin mikabat kini og P4.25-million.
Samtang nasikop usab ang laing durugista atol sa anti-drug operation sa PNP sa Brgy. Subangdaku, dakbayan sa Mandaue.
Giila ang gituohang drug supplier nga si Thomrie Jay Llaguno, 30 anyos, ug nagpuyo sa B. Rodriguez St., dakbayan sa Sugbo.
Nasakmit sa kapulisan ang mga dinagkong pakete sa shabu nga nagkantidad og P2.38-million.
Natanggong ang duha sa ilang tagsa-tagsa ka mga prisuhan ug mag-atubang og kasong kalapasan sa Comprehensive Dangerous Drugs Act.
