CENTRAL VISAYAS- Dul-an sa 20,000 ka kaso sa dengue ang natala sa Central Visayas diin kapin sa 6,000 sa mga kaso niini kay positibo.
Sa datus sa Center for Health Development Communications Management Unit sa Department of Health 7, ang Probinsya sa bohol ang adunay pinakadaghang kaso sa dengue gikan sa Enero hangtod Agosto 31, 2024 nga niabot na sa 6,354 ang kaso diin 12 niini ang namatay.
Samtang ang Probinsya sa Sugbo anaa sa ikaduhang puwesto sa listahan nga adunay 5,956 ka kaso; 13 ang namatay sa dengue.
Ingon man nga anaa sa ikatulo ang Probinsya sa Negros Oriental nga adunay 3,373 ug unom ka kaso sa namatay; samtang ang Probinsya sa Siquijor nakatala og 807 ka mga kaso nga walay namatay.
Alang sa highly urbanized nga mga siyudad, ang Dakbayan sa Sugbo nag-una sa listahan nga adunay 1,839 ug lima ang namatay.
Anaa sa ikaduhang puwesto ang Dakbayan sa Lapu-Lapu nga adunay 685 ug zero ang namatay nga kaso.
Niabot usab sa 554 ang mga kaso sa dakbayan sa Mandaue ug tulo ang patay.
Sa 19,568 ka kaso sa dengue nga natala, ang kumpirmadong kaso niini kay 6,287 samtang ang probable cases niabot sa 7,447.
Sama sa alang sa gidudahang mga kaso, ang mga numero miabot sa 5,834.
