Gikumpirmar sa Nigeria ang usa ka kaso sa Ebola virus disease sa kaulohan niini, ang Abuja, human nakita sa mga resulta sa laboratory test ang virus diha sa usa ka pasyente nga babaye nga bag-o lang mibiyahe gikan sa Uganda.
Matod ni Nigerian Health Minister Muhammad Ali Pate, ang pasyente anaa karon sa isolation ug nakadawat sa gikinahanglang medikal nga pag-atiman, samtang ang mga awtoridad naghimo og mga lakang aron mapugngan ang posibleng pagkatap sa sakit.
Usa ka taho gikan sa World Health Organization (WHO), nagpakita nga ang pasyente nagsugod sa pagpakita og mga simtomas niadtong Oktubre 7, upat ka adlaw human siya miabot sa Nigeria. Mibisita siya sa usa ka pribadong pasilidad sa panglawas sa Abuja niadtong Oktubre 11, ug ang impeksyon gikumpirmar pinaagi sa laboratory testing niadtong Oktubre 20.
Gikanayon usa sa mga awtoridad nga adunay 44 ka mga indibidwal nga posibleng nakahimamat sa pasyente ang nailhan pinaagi sa contact tracing. Busa, hugot nilang gibantayan aron mahibal-an kung aduna pa ba’y laing mga tawo nga posibleng na-expose sa virus.
Lakip sa mga nailhan ug gibantayan sa mga awtoridad sa panglawas mao ang mga health worker, ubang mga pasyente, mga tig-atiman, ug mga indibidwal nga posibleng nakahimamat niya atol sa iyang pagbiyahe.
Nagpadayon ang imbestigasyon aron mahibal-an ang posibleng tinubdan sa impeksyon ug aron matino ang kompletong kasaysayan sa pagbiyahe ug pagkaladlad sa virus sa pasyente.
Ang Ebola usa ka grabe ug posibleng makamatay nga sakit nga dala sa Ebola virus. Ang kasagarang mga simtomas naglakip sa hilanat, grabeng kahuyang, sakit sa ulo, sakit sa lawas, pagsuka, ug kalibanga. Sa pipila ka mga kaso, mahimo usab nga adunay pagdugo.
Ang virus mokaylap pinaagi sa direktang kontak sa dugo o uban pang pluwido sa lawas sa usa ka tawo nga natakdan, ingon man pinaagi sa mga butang nga kontaminado. Mahimo usab nga matakdan ang usa ka tawo pinaagi sa direktang kontak sa lawas sa usa ka tawo nga namatay tungod sa Ebola.
