MANDAUE CITY, CEBU- Dili lamang silot, kondili usa ka higayon alang sa pagbag-o ug pagbalik sa husto nga dalan — mao kini ang tumong sa bag-ong programa sa Mandaue City Jail nga gitawag og “College and Skills Behind Bars Program.”
Sa pakighinabi sa Bombo Newsteam, gipasiugda ni Jail Superintendent Jessie James Gingoyon, City Jail Warden sa BJMP-Mandaue, ang importansya sa programa isip bahin sa paningkamot sa gobyerno nga mapakunhod ang pagbalik sa krimen o recidivism.
Pinaagi sa suporta sa Mandaue City Government, opisyal nang gilunsad ang maong inisyatiba diin 39 ka Persons Deprived of Liberty (PDLs)— gilangkuban sa 28 ka lalaki ug 11 ka babaye— ang nahimong unang batch nga nagsugod sa ilang kolehiyo sulod mismo sa pasilidad niadtong Lunes.
Matud ni Gingoyon, ang edukasyon usa sa labing epektibong pamaagi aron maputol ang siklo sa kriminalidad pinaagi sa paghatag sa mga PDL og bag-ong kahibalo, kahanas, ug mas positibong panan-aw sa kaugmaon.
Ubos sa programa, ang mga partisipante makakuha og kurso nga Bachelor of Science in Business Administration (BSBA) uban ang technical-vocational skills training.
Tumong niini nga maandam sila sa pagpangita og lig-on nga panginabuhian o pagtukod og kaugalingong negosyo sa higayon nga makagawas na sila sa pasilidad.
Gipasabot ni Gingoyon nga dili lamang diploma ang gihatag sa maong programa, kondili apil usab ang pagpalig-on sa mental ug emosyonal nga kahimtang sa mga PDL alang sa ilang pagbalik sa komunidad.
Ang mga klase ginahimo pinaagi sa face-to-face nga pagtudlo sa mga propesor gikan sa Mandaue City College (MCC) nga mosulod mismo sa pasilidad aron maghatag og edukasyon sa mga benepisyaryo.
Bisan pa sa mga pangutana ug kritisismo sa pipila ka sektor nga nag-ingon nga gihatagan og daghang pribilehiyo ang mga piniriso, gipatin-aw ni Gingoyon nga kabahin kini sa mandato sa Bureau of Jail Management and Penology (BJMP) nga maghatag og rehabilitasyon, dili lamang pagpahamtang og silot.
Giklaro usab sa warden nga kung adunay PDL nga makagawas o ma-parole samtang nagpadayon pa ang kurso, tugotan gihapon sila nga mopadayon sa ilang pag-eskwela nga walay bayad sa Mandaue City College.
Pinaagi niini nga programa, gilauman sa Mandaue City Jail nga mahimong lugar kini sa pagbag-o ug paglaum, diin ang mga PDL hatagan og kahigayonan nga mahimong produktibo ug andam nga miyembro sa katilingban.
