CEBU CITY-Tanggong na sa prisohan ang embalmer kun tigbalsamar human kini manglogos og 16 anyos nga dalagita sa may El Prado lungsod sa Boljoon probinsya sa Sugbo.
Naila ang suspect nga si Santos Pila Jr. alyas Junior Butod, 43 anyos minyo apan buwag sa asawa.
Sa imbestigasyon ni Police Executive Master Sergeant Cristina Pantohan nga nawala ang naasoy nga dalagita kinsang dunay deperensya sa panghuna-huna niadtong Pebrero 13 ug wala kini makit-e hangtud na pesta 14 kung diin duna’y nakasaksi nga niadtong petsa 13 misakay ang biktima sa motor sa suspect ug sa buntag sa Pebrero 14 nakit-an na usab nga kini gisakay sa motor sa suspect.
Sa pag-am-am matud pa sa maguwang sa biktima didto kini mibutyag nga gihilabtan siya ni Alyas Junior Butod sa makadaghang higayon human gidala sa bukid.
Dali nga nasikop ang suspect apan mihimakak kini sa maong pasangil ug nagkanayon nga igo ra niya gihatod ang dalaga sa usa ka kan-anan.
Sa pagsuwat niining balitaa ang dalagita kasamtangang naa sa pink room human gipa-ubos sa examination aron sa pagsuta kung kini nahilabtan ba.
