Niduso og balaudnon si Senador Alan Peter Cayetano nga maghatag og dugang benepisyo ug proteksyon sa mga katabang sa panimalay.
Ubos sa Senate Bill No. 418 o ang Enhanced Batas Kasambahay Act, ang mga katabang sa panimalay hatagan og libreng tambal, access sa edukasyon, ug mas estrikto nga pagpatuman sa ilang mga katungod.
Ang kasamtangang Republic Act No. 10361 palapdan usab aron matubag ang nagpadayon nga mga problema sa ubos nga sweldo, kakuwang sa skills training, ug limitado nga suporta sa panglawas sa mga katabang sa panimalay.
Samtang, ang mga katabang sa panimalay hatagan og labing menos usa ka oras matag adlaw o unom ka oras matag semana alang sa skills training o alternative education para sa mga katabang sa panimalay. Ibayad kini isip kabahin sa ilang oras sa pagtrabaho.
Aron pagsuporta sa online learning, ang Department of Labor and Employment (DOLE) gimanduan nga maglunsad og programa nga maghatag og internet-enabled device ngadto sa mga katabang sa panimalay.
Dugang pa, ang Kasambahay Education Inter-Agency Committee pagatukuron, nga gilangkoban sa DOLE, Technical Education and Skills Development Authority (TESDA), Department of Education (DepEd), ug Commission on Higher Education (CHED), nagtumong sa pagpalambo sa mga praktikal nga modules, pagsiguro sa pag-access bisan pa sa teknikal nga limitasyon, ug pagbalanse sa katungod sa mga amo ug mga domestic worker.
Ang balaudnon nagpalig-on usab sa pagpatuman sa mga obligasyon sa mga amo nga magparehistro sa mga domestic worker sa SSS, PhilHealth, ug Pag-IBIG, para adunay dugang nga suporta alang sa mga domestic worker nga biktima sa pag-abuso o pagpahimulos.
