CEBU CITY — Gilusad na sa Cebu Provincial Government ang programang “Enhanced Countryside Development” sa tinguha nga palambuon pa ang panginabuhian sa mga mag-uuma ug mananagat human sa nasinating coronavirus lockdown.
Gipirmahan nilang Cebu Governor Gwendolyn Garcia ang memorandum og agreement kauban ang tulo ka mga government banks alang sa katumanan sa maong programa.
Ubos sa ECD, mahatagan og pondo ang mga mag-uuma ug mananagat aron makabangon ug palambuon pa ang ilang negosyo.
Mahitabo kini pinaagi sa pagtanyag og mga pautang diin gipahaum ang interest rates ug mga terms and conditions sa kondisyon sa mga mahatagan sa programa.
Samtang himoong taytayan ang Provincial Government alang sa pag-promote sa produkto gikan sa inani sa mga mag-uuma ngadto sa mga konsumidor.
Gihimug-atan ni Garcia nga hilabihang apektado sa coronavirus lockdown ang mga mag-uuma ug mananagat sa lalawigan.
Matud sa gobernadora nga kinahanglang masulbad ang problema sa supply sa pagkaon pinaagi sa pagpananom og mga lagutmon ngadto sa mga yuta sa probinsya nga wala magamit.
Hinungdan nga mi-awhag si Garcia sa mga local chief executives ug sa kagamhanan sa nasud nga magtinabangay aron nga molambo pagbalik ang ekonomiya sa Sugbo pinaagi sa ECD.
