Nakaandam na ang entablado sa Cebu City Sports Center (CCSC) o ang karaang Abellana Sports Complex para sa umaabot Sinulog sa sunod buwan sa Enero 2026.
Kini ang gipaambit nga impormasyon ni Cebu City Councilor Dave Tumulak atol sa eksklusibong pakighinabi niini sa Bombo Radyo Cebu News Team diin gipangunayan pa sa opisyal ang pagsusi sa preprasyon sa pagtaud sa entablado ug uban pang mga gipangplastada nga gamiton sa pasundayag sa pinaka-engrandeng kapistahan sa nasud.
Sayong gipahimutang ang entablado aron mahimuslan kini sa mga contigents nga maka-praktis sila sa dili pa ang pormal nga adlaw sa Sinulog sa Enero 18.
Gibana-bana niini nga anaa na sa kapin 60% ang kaandam sa dakbayan para sa kapistahan sa emergency response man o sa hisgutanan kalimpyo ug waste disposal.
Samtang sa pikas bahin, gisaysay sab sa opisyal nga nagpahimutang napud sila sa mga stalls nga abangan sa mga manindahay dapit sa City Central School subay sa dalan Osmeña Boulevard isip han-ay silang makapamaligya sa mga souvenirs.
Dugang pa nga ang mga uban pang kalingawan sa dakbayan kay nakasugod na sama sa Fuente Osmeña Circle sa “Pasko sa Sugbo” nga pwedeng masuyuran timaan sa pagsaulog sa Pasko ug umaabot Sinulog.
