Masaligon si Senador Jinggoy Estrada nga maaprobahan ang iyang gisugyot nga balaudnon nga hingpit nang wagtangon ang Senior High School — dugang duha ka tuig nga pagtungha.
Matod ni Estrada, sila si Department of Education (Deped) Secretary Sonny Angara ug Presidente Ferdinand Marcos Jr. namahayag nga adunay problema sa pagpatuman sa K-12 curriculum, hinungdan nga masaligon kini nga mapasar ang iyahang sugyot.
Samtang, nagtuo si Estrada nga mahimong debatehan sa kinatibuk-an ang iyang gisugyot nga balaudnon nga wagtangon ang SHS ug ang gisugyot nga balaudnon ni Senador Sherwin Gatchalian nga pakunhuran og usa ka tuig ang pagtungha sa mga tinun-an sa kolehiyo.
Ubos sa rationalized basic education program, gisugyot ni Estrada ang usa ka tuig nga edukasyon sa kindergarten, unom ka tuig sa elementarya ug upat ka tuig sa sekondarya.|Bombo Irene Ardiente
