CEBU CITY – Ni-plead guilty o ni-angkon nga sad-an si kanhi Bohol Provincial Board member Niño Rey Boniel sa pagpatay sa iyang asawa,nga kanhi mayor sa lungsod sa Bien Unido, Bohol nga si Gisela Boniel.
Nihimo og pamahayag o plea si Boniel atol sa pagdungog sa iyang kasong parricide atubangan sa Regional Trial Court (RTC) Branch 70 sa dakbayan sa Lapu-Lapu niadtong Martes, Pebrero 8, 2022.
Sa eksklusibong pakighinabi sa Bombo Radyo Cebu kang Atty. Amando Virgil Ligutan, kinsa nagsilbing private prosecutor sa kaso,nga ang kanhi PB member ni-plead sad-an sa krimen nga homicide pinaagi sa plea bargaining agreement uban sa state prosecutors.
Gisentensiyahan si Boniel og walo ngadto sa 14 ka tuig nga pagkapriso tungod sa kasong parricide.
Apan, gibutyag ni Ligutan nga wala pa mahuman ang buwag nga kasong gi-atubang ni Boniel gumikan mag-atubang pa kini og kaso sa kidnapping ug serious illegal detention.
Kahinumduman , base sa mga saksi nga gidagit si Gisela sa Bohol, gipusil sa ulo, giputos ug gisakay sa pumpboat, dayon gilabay sa kadagatan sa Caubian Island ug Olango Island sa Lapu-Lapu City niadtong Hunyo 2017.
Gihimo ang search and rescue operations apan wala makaplagi ang iyang lawas.
