Gikompirmar sa National Bureau of Investigation nga niluwat og commitment order ang korte sa Manila nga nagmando kanila nga ibalhin sa Manila City Jail si kanhi Kongresista Arnolfo Teves Jr.
Kini ang gipahibalo sa kasamtangang direktor sa bureau, si Retired Judge Jaime B Santiago, sa usa ka press conference karong adlawa.
Apan matud niya nga lain-laing mga korte sa Manila ang nag-atiman sa mga kaso nga giatubang sa kanhi kongresista, mao nga iyang gi-hold ang naasoy nga kamandoan.
Dugang ni NBI Chief Santiago nga kasamtangang nagpaabot pa sila sa pinal nga desisyon sa mosyon nga gisumiter sa kampo ni Teves alang sa konsolidasyon sa mga kaso.
Ingon man nga mao na kini ang magdeterminar kon asa ibalhin ang kanhi kongresista nga anaa karon sa ilang kustodiya. | Bombo Irene Ardiente
