Patay ang usa ka ex-convict human nga giingong misukol sa kapulisan atol sa buybust operation, Pebrero 19 sa gabii, sa Brgy. Lawaan, Dumanjug, Cebu.
Giila ang subject sa operasyon nga si Alvin Alpuerto Dinopol, gibana-banang anaa sa 40 anyos ang pangidaron, ug nagpuyo sa nahisgutang dapit.
Matud sa hepe sa Dumanjug Police Station nga si Police Major Ardioleto Cabagnot, nga kalit lang mibunlot og armas si Dinopol human masayud nga nakig-deal kini sa pulis.
Mipusil ang subject sa operasyon ngadto sa otoridad apan mibawo usab ang kapulisan ngadto kang Dinopol.
Dugang pa ni Cabagnot nga nagpatawag sila og Emergency Response Team apan nakabsan sa kinabuhi kadugayan ang dinakpan.
Nasayran nga napriso kaniadto ang subject sa kasong pagkalambigit sa ilegal nga drugas.
Narekober sa kapulisan ang usa ka .45 revolver nga armas ug adunay buhing mga bala, ug usa ka gagmay nga pakete sa shabu.
