Nipasaka og not guilty plea ang kanhi DPWH Secretary nga si Manuel Bonoan sa Sandiganbayan Second Division sa iyang kasong graft tungod sa giingong flood control kickback scheme niadtong Biyernes.
Nakita si Bonoan nga misulod sa korte nga walay mga pulis nga nag-eskort human ang Sandiganbayan Fifth Division, nga sa sayo pa mibasura sa iyang gilain nga mga kaso sa plunder ug graft, nagmando sa iyang pagpagawas gikan sa kustodiya sa pulisya.
Human sa pagbasa sa arraignment, gipadayon dayon sa korte ang pre-trial kon diin nagtigum ug nagtala og mga dokumento ug ebidensya ang prosecution ug defense.
Nitambong usab sa hearing pinaagi sa teleconference si Senator Jinggoy Estrada, nga lakip usab nga akusado sa maong kaso.
Sa gihimong nga pag-usisa sa mga facts, gihangyo ni Presiding Justice Geraldine Econg ang prosecution nga isaysay ang ilang posisyon batok sa mga akusado.
Sumala sa prosecution, ang posisyon sa gobyerno mao nga gigamit ni Estrada ang iyang gahum aron mapadali ang paglakip sa mga proyekto sa General Appropriations Act (GAA) 2025.
Pagkahuman niana, giingong gi-impluwensyahan sa senador ang paghatag sa maong mga kontrata sa mga paboritong contractor sa dihang naaprubahan na ang mga proyekto.
Apan gisalikway ug gihimakak pag-usab ni Estrada ang maong mga pasangil ug gitin-aw nga wala gayud siya’y labot sa proseso sa bidding sa DPWH o sa pagpili sa mga contractor sa maong mga proyekto.
Matud pa ni Estrada, wala siya sukad nakig-uban sa bisan unsang bidding sa DPWH ug gani nangutana siya kon unsaon niya pag-impluwensya sa paghatag og kontrata kung wala man gani siya’y mailhi nga opisyal gikan sa maong ahensya.
Isip tubag, gipahinumdoman ni Presiding Justice Econg si Estrada nga aduna pa siya’y igong panahon sa pagpresentar sa iyang mga depensa ug ebidensya sa pag-abot na sa pormal nga trial stage.
