Nisang-at ang kampo ni Senador Jinggoy Estrada og Motion for Reconsideration sa Sandiganbayan Fifth Division, nga nagtinguha nga balihon ang naunang desisyon sa korte nga nagbasura sa iyang aplikasyon alang sa piyansa sa kasong plunder.
Gihimo kini human gibasura sa Sandiganbayan niadtong Hulyo 24, 2026 ang iyang mosyon nga magtakda og piyansa.
Base sa resolusyon sa korte, sayo pa ang maong mosyon. Gipasabot sa Sandiganbayan nga ang kasong plunder adunay silot nga reclusion perpetua, busa dili awtomatikong katungod ang piyansa.
Kinahanglan una nga ipahigayon ang usa ka evidentiary hearing aron mahibal-an kung lig-on ba o dili ang ebidensiya sa prosekusyon.
Sa bag-ong mosyon nga gipetsahan og Agosto 3, 2026, giinsistir sa mga abogado ni Estrada nga dili siya usa ka flight risk ug nga nagpabilin siyang usa ka piniling opisyal sa gobyerno nga adunay termino hangtod Hunyo 2028.
Gipasiugda usab sa kampo sa senador nga kanunay siyang mituman sa mga kondisyon nga gipahamtang sa korte sa iyang mga nangaging biyahe sa gawas sa nasud.
Matud nila, mibalik siya sa Pilipinas human gitugotan nga mobiyahe sa Singapore gikan Abril 21 ngadto sa 25, 2026, ug sa Japan gikan Marso 20 hangtod Abril 5, 2026.
Tungod niini, gihangyo ni Estrada ang Sandiganbayan nga usbon ang resolusyon niini niadtong Hulyo 24 ug magpagawas og bag-ong desisyon nga motugot sa iyang aplikasyon alang sa piyansa sa kasong plunder.
Kahinumduman nga ang kasong plunder batok kang Estrada naggikan sa giingong P573 milyon nga kickback sa mga proyekto sa flood control, nga gisang-at sa Office of the Ombudsman sa Sandiganbayan niadtong Mayo 28, 2026.
