Bisan og giangkon nga nadungog na ang Davao Death Squad (DDS), giklaro ni kanhi Philippine Drug Enforcement Agency (PDEA) Director General Wilkins Villanueva nga wala siyay daghang kasayuran bahin sa kontrobersyal nga grupo.
Atol sa pagtunga ni Villanueva sa ikanapulo nga House Quad Committee hearing, gipangutana ni Zambales 1st District Representative Jeff Konghoun ang kanhi hepe sa PDEA kon aduna ba siyay nahibaloan bahin sa kontrobersyal nga DDS.
Gitubag ni Villanueva nga bisan og nadestino siya sa Rehiyon XI sa ulahing bahin sa termino ni Duterte, wala lang siya nakatutok sa Davao City diin ang pamilyang Duterte ang nagmando.
Matod niya, DDS ra ang iyang nadunggan apan wala pa siyay kahigayonan nga makakita sa maong grupo.
Gitataw ni Villanueva, tungod kay halos kada adlaw kini madungog, daw gidawat na kini isip general information, bisan og dili makita ang maong grupo.
Nangutana usab si Cong. Konghoun si Villanueva sa iyang ikasulti bahin sa dakong drug war ni kanhi PRRD.
Gitubag ni kanhi Duterte appointee, gawas sa mga kaso sa extrajudicial killings, dako og epekto ang war on drugs, ilabi na kon base sa Barangay Drug Clearing program sa miaging administrasyon.
Kahinumduman, niadtong Mayo-28 sa tuig 2020 dihang nanumpa si Villanueva isip Director General sa PDEA ug nagpadayon siya hangtod sa paglingkod ni Presidente Ferdinand Marcos Jr. apan sa ulahi gipulihan usab siya ni USec. Moro Virgilio M. Lazo, usa ka retiradong heneral sa PNP Special Action Force.
