CEBU CITY — Padayong gi-imbestigaran sa kapulisan kung unsa ang laing pang angulo sa pagpusil-patay sa usa ka kanhi seaman sa may M.L. Quezon Highway sa Brgy. Pajo dakbayan sa Lapu-Lapu.
Matud ni Police Master Sergeant Rody Jaganap, kinsang maoy duty investigator, nga ang biktima giilang si Irving Querubin, 49 anyos taga Brgy. Basak sa naasoy nga dakbayan, diin gikan pa kini mitambong og hearing para sa iyang kaso sa iligal nga drogas.
Nagsakay matud pa sa usa ka awto nga gidrayban ni Niel Costabella, 45 anyos, ug duha ka igsoon sa biktima sa dihang gipauwanan kini og bala sa duha ka gunmen nga nagsakay og motor nga naka-full face helmet.
Naigo sa paa si Costabella, samtang naigo sa ulo si Querubin apan luwas ang lain pang duha.
Dali nga gidala si Querubin sa tambalanan apan gideklarar kining dead on arrival.
Basi usab pasiuna nga imbestigasyon, samtang nagdagan ang sakyanan girakrakan kini sa mga mamumuno tungod sa mga bala nga narekober sa kapulisan.
Nasuta usab nga anaa sa watchlist ang namatay diin, matud pa, usa kini ka drug user.
Mao usab kini karon ang nakita nila nga primary angle sa krimen apan padayon pa ang ilang pagsuta sa lain pang posibleng angulo ingon man ang pag-ila sa nga suspect.
