Uyon ang Federation of Free Farmers sa dugang budget nga gitagana sa Bicameral Conference Committee ngadto sa buhatan sa Department of Agriculture sa tuig 2026.
Atol sa pakighinabi sa Bombo Radyo Cebu Newsteam kang Leonardo Montemayor, Kanhi Agriculture Secretary ug ang chairman sa Federation of Free Farmers gipadayag niini nga wala silay supak o pag-kwesyon sa giaprobahan sa Kamara nga dul-an P300
milyon nga budget sa 2026.
Matud niini nga dako kini nga kantidad kon itandi sa kasamtangang budget ning tuiga.
Hinuon, gipaambit ni Montemayor nga ang 2025 budget kay nakatabang sa mga mag-uuma apan dili gihapon kini tukma sa ilang mga panginahanglanon.
Busa, pabor ang ilang grupo apan nagpaabot pa sila sa pinal nga taho kung uyonan ba usab sa Senado ang maong budget.
Sa pikas bahin, gikuhaan usab kini og habig kabahin sa pagtaas sa presyo sa bugas sa Pilipinas bisan paman sa pagpasalig sa gobyerno nga walay pagpahamtang sa pagsaka sa presyo nunot usab sa rice import ban.
Apan, matud niini nga tungod kay nagkahurot ang supply nga gi-import, ingon man ang mga local nga palay hinungdan nga posibleng nisaka ang demand ug miresulta sa pagsaka sa presyo sa bugas.
Hinuon, nipasalig si Montemayor nga igo pa ang supply sa Pilipinas hangtud sa hinapos ning tuiga.
