CEBU CITY- Nagpahayag og kabalaka si Leonardo Montemayor, kanhi kalihim sa Department of Agriculture ug chairman sa Federation of Free Farmers, sa mahimong epekto sa ipatuman nga P50 kada kilo nga price ceiling sa bugas ngadto sa sektor sa agrikultura ug sa mga mag-uuma sa nasod.
Sa pakighinabi sa Bombo Radyo, miingon si Montemayor nga bisan pro-consumer ang maong polisiya sa gobyerno, wala pa masayri kon unsa ang mahimong long-term nga epekto niini sa mga mag-uuma og bugas.
Matod niya, adunay posibilidad nga mokunhod ang presyo sa bugas tungod sa pressure nga mabati sa mga rice trader ug retailer nga mapugos sa pagbaligya sa bugas sa mas ubos nga presyo.
Gipasabot usab ni Montemayor nga daghang retailer ang nagreklamo nga mahal na daan ang imported rice nga ilang mapalit gikan sa mga supplier, busa posible silang malugi kon ibaligya kini sa P50 kada kilo o mas ubos pa.
Dugang niya, dili lamang mga retailer ang mahimong maapektuhan sa price ceiling kondili lakip usab ang mga mag-uuma nga posible makasinati og pagkunhod sa farmgate price sa palay.
Matod pa sa kanhing agriculture secretary, adunay mga lugar sa nasod nga nagsugod na og pagkunhod ang presyo sa bugas tungod sa daghang imported rice nga mosulod sa merkado.
Gipasiugda usab ni Montemayor nga samtang gipaningkamotan sa gobyerno nga mapabarato ang presyo sa bugas alang sa konsumidor, kinahanglan usab tan-awon ug protektahan ang kahimtang sa mga lokal nga mag-uuma aron dili sila mawad-an og kita ug produksyon.
Dugang pa niya, kinahanglan usab nga tutokan sa gobyerno ang smuggling, hoarding, ug profiteering sa bugas kay posible nga mao kini ang dakong hinungdan kon nganong nagpabiling mahal ang presyo sa bugas bisan pa man kon daghan na ang imported rice nga mosulod sa nasod.
