CENTRAL VISAYAS-Sugdan na karong adlawa ang filing sa sertipiko de kandidatura o certificate of candidacy para sa mga manglansar sa umaabot Mayo 12, 2025 Midterm Local and National Elections.
Maglangkob kini gikan karong adlawa sa Martes Oktubre 1 hangtud 8 diin sab dawatan sa Commission on Elections (COMELEC) ang Certificate of Nomination and Acceptance (CONA) gikan sa mga rehistradong partidong politikal nga magbitbit isip standard bearers sa ilang pundok.
Matud pa sa COMELEC nga ang mga kandidato nga pakyas makasumiter sa ilang CONA sulod sa walo ka adlaw nga filing period kay isipon silang independente.
Sa pakighinabi sa Bombo Newsteam kang Omar Sharif Mamalinta, ang tigpamaba sa COMELEC-7 diin gidetalye niya ang tukman pag file sa mga aspirants nga mahimong kandidato sa 2025 nga piniliay.
Sa 2025 midterm elections, ang mga botante sa tibuok nasud mopili og 12 ka senador, 254 ka district representative, 63 ka party-list representative, 82 ka gobernador ug bise gobernador, ug liboan ka mga opisyal sa lokal nga kagamhanan sa lebel sa probinsiya, siyudad, ug munisipyo.
Dugang pa, ang mga botante sa BARMM mopili ug 25 ka membro sa parliament ug 40 ka party-list representatives.
Dugang pa ni Mamalinta nga ang kataposang ihap sa mga bag-ong botante madeterminar atol sa Election Registration Board hearing karong Oktubre 14, diin ang mga opisyal mosusi sa mga dokumento nga gisumite sa mga bag-ong nagparehistro.
