Temporaryong gipahunong ni Cebu City Mayor Nestor Archival Sr. ang bag-ong mga flood control projects nga ipatuman sa dakbayan nga nagbalor og P751.2-milyones tungod kay wala nakig-koordinar ang Department of Public Works and Highways (DPWH) sa Kagamhanang Dakbayan.
Sumala pa sa eksklusibong pakighinabi sa Bombo Radyo Cebu kang Mayor Archival nga adunay 21 ka mga proyekto (10 sa North District ug 11 sa South District) ang gipahunong nga napundohan karong 2025 nga pending pa ang status.
Gihimug-atan niini nga dili masugakod sa dakbayan ang mga bulay-og nga pagkabuhat nga mga proyekto nga makamugna pa hinuon og bag-ong problema sama sa kahuot sa trapiko ug uban pa nga hilabihang nakahasol sa publiko.
Gani dugang pa sa mayor nga nagtakda na kini siya og panahon nga makigpulong sa DPWH aron klarohon ang maong mga ipatuman proyektong pangontra sa baha sa syudad.
Ingon man nga giangkon ni Archival nga walay gahum ang kagamhanang dakbayan sa mga proyektong ipatuman sa DPWH tungod kay ang mga kontraktor kay direktang nakigtransaksyon sa bidding sa maong ahensya pangimprastruktura.
