CEBU CITY – Pagpabalik sa dakbayan sa Sugbo isip “Mango Capital” sa nasud ang usa sa tumong sa Memorandum of Agreement (MOA) nga namugna tali sa Cebu City Government ug sa Department of Agriculture (DAR-7) sa Oktubre 21, 2020.
Alang kini sa “Enhance KADIWA ni Ani at Kita Inclusive Food Supply Chain Program” ug gilakip niini ang “Regional Food Terminal” aron nga masiguro nga adunay igong supply ug barato nga presyo sa mga pagkaon alang sa mga kabus nga mamalitay sa Sugbo.
Matud pa ni DAR-7 Director Atty. Salvador Diputado nga tumong niini nga mapalambo ang agrikultura sa Dakbayan sa Sugbo kung diin manghatag ang ahensya og 3 ka libo nga liso sa guyabano ug nangka nga itanom sa nagkadaiyang bahin sa syudad.
Mapasalamaton si Cebu City Mayor Edgardo Labella sa buot nga tinguha ni Diputado ug buot usab niini nga mahibalik ang dakbayan sa Sugbo isip “Source” kiniadto sa mga Manga lukop nasud.
Apil usab sa maong proyekto mao ang pagtukod og bagsakan center ug upat ka food terminal alang sa mga lagutmon nga gikan sa bukirang barangay sa syudad nga barato nga ibaligya, apil na niini ang mga produkto gikan sa Mindanao ug kasigbit nga probinsya.//EKP
