CEBU CITY- Gihatagan og importansya sa mga foreign ministers sa gipahigayon nga Association of Southeast Asian Nations Foreign Minister’s Retreat ang pagsulbad sa krisis sa Myanmar tungod kay nasuta nila nga walay miyembro sa junta military nga makarepresentar sa nasud sa ASEAN.
Matud ni Department of Foreign Affairs Secretary Maria Theresa Lazaro kagahapong adlawa, Huwebes atol sa usa ka press conference nga gihimo sa ASEAN International Media Center sa Dakbayan sa Mandaue, nga nakasentro ang panagtagbo sa mga delegado sa nahisgutang kalihokan.
Sigon ni Lazaro, gihisgutan sa kalihokan ang political crisis sa nasud nga Myanmar nga miresulta sa pagmugna sa 5-point consensus, nga nagpasiugda sa kamahinungdanon sa kalamboan sa nasud sa malinawon nga paagi ug nanawagan sa Myanmar labi na sa kagamhanan sa junta militar, alang sa libre, patas ug tinuod nga eleksyon sa nasud.
Gipasalamatan usab ang suporta sa mga nasud nga miyembro sa ASEAN alang sa pagbalik sa civilian government sa Myanmar, usa ka importanteng estado nga miyembro sa rehiyon.
Gihimug-atan nga ang mga member-state dili manghilabot sa sitwasyon sa politika sa nasud og gidugang nga kinahanglan nga maggikan sa mismong kagamhanan sa nasud ang kagustohang kabag-ohan.
Samtang, lakip usab sa mga nahisgutan sa panagtigom ang code of conduct sa West Philippine Sea diin ang mga miyembro sa ASEAN naglatid sa ilang baruganan sa isyu sa maong disputed Island hinungdan nga magpahigayon usab sila og laing conference maylabot niini.
Sapikas bahin gihimo usab ang mga bilateral meetings sa retreat uban sa mga foreign ministers gikan sa nagkalain-laing nasud sama sa China, Japan ug uban pa.
