Nadakpan na sa mga sakop sa kapulisan sa Sawang Calero Police Station 6 ug Tactical Motorcycle Riding Unit (TMRU) Cebu City Police Office, ang 3 ka mga suspitsado sa pagpamusil patay sa usa ka babaye sa Sitio Miñulida, Barangay Calamba, Dakbayan sa Sugbo, niadtong pasado alas 5 sa hapon, Mayo 21, 2026.
Pasado alas 8 kagahapon sa buntag Mayo 22, 2026 nasikop sa kapulisan sa Sitio Kawayan, Barangay Sambag 2, Cebu City ang mga suspetsado nga gilangkuban sa duha ka 16-anyos ug usa ka 18-anyos nga mga batan-ong lalake.
Usa ka 16-anyos ang nahimonh gunman niini, samtang ang laing 16-anyos ug ang 18-anyos nga si alias “Tinoy” maoy gikatahong nagsilbing lookout sa maong pagpamanhig.
Samtang wala pa mailhi ang biktima, gumikan kay gikatahong dayu lang ang mismong biktima wala pay nakaila kaniya.
Gikatahong may kalambigitan sa illegal nga drugas ang motibo sa pagpatay sa maong biktima.
Sa pikas bahin, mibutyag si Police Colonel George Ylanan, ang City Director sa Cebu City Police Office nga padayon pa ang pagpahigayon sa imbestigasyon sa maong kaso bisan paman nga nasikop na ang mga suspitsado.
Dugang ni Ylanan, dako ug tabang nga adunay nakabutang nga CCTV sa lugar gumikan kay human sa insidente ug base sa ilang imbestigasyon, dali rang nailhan sa mga kapulisan ang mga suspitsado.
