Mius-os ngadto sa pito ka milyon ka ektarya, ang kalasangan sa Pilipinas base sa pinakaulahing report gikan sa Department of Environment and Natural Resources (DENR).
Wala pa kini sa katunga sa kapin sa 15 milyon nga ektarya sa kalasangan sa nasud.
Ang Pilipinas adunay kinatibuk-an nga 30 ka milyon ka ektarya nga yuta ug ang katunga niini kaniadto giklasipikar nga mga yuta sa kalasangan.
Matud pa ni Environment Secretary Maria Antonia Yulo-Loyzaga, ang tibuok kalibutan apektado sa climate change, pagkawala sa biodiversity, ug polusyon, ug ang kalasangan sa Pilipinas dili immune niini.
Gawas sa kalasangan, apektado usab ang pangisda ug tubig sa nasud.
Tungod sa sobra nga pagkawala sa bagang kalasangan sa nasud, naningkamot karon ang ahensya aron madugangan ang pito ka milyon ka ektarya nga yuta sa kalasangan ngadto sa napulo ka milyon ka ektarya.
Gipasabot ni Loyzaga nga sa miaging tuig, ang ahensya nakahimo sa pag-mapa sa 1.2 milyones ka ektarya nga yuta nga ablihan sa nagkadaiyang people’s organizations nga motabang sa reforestation project niini.
Nanghinaot ang kalihim nga madugangan pa kini og laing tulo ka milyon ka ektarya, nga ang tanan ipaubos sa reforestation sa tuig 2028.
