Gikabutyag ni Jaime Paglinawan ang Chairperson sa Bayan Central Visayas, nga gipanglangtawan karon sa Alyansa Makabayan Central Visayas nga ang bag-ong mando ni Presidente Ferdinand R. Marcos Jr. kabahin sa usa ka four-day workweek usa ka “band aid” nga klase nga solusyon subay sa problemang giatubang karon sa nasud.
Niadtong Marso 2, nagmando ang presidente og temporaryong pagpatuman sa four-day workweek sa pipila ka mga opisina sa ehekutibo sugod Marso 9, isip kabahin sa mga paningkamot sa gobyerno sa pagdaginot sa enerhiya ug pagpakunhod sa paggamit sa gasolina taliwala sa pagsaka sa presyo sa lana sa kalibutan nga gipahinabo sa nagpadayon nga krisis sa Middle East.
Subay niini, atol sa eksklusibong pakighinabi sa Bombo Radyo Cebu newsteam ni Paglinawan, gitino niya nga sa maong kamandoan sa presidente, adunay ma-apektaran niini nga mga serbisyo sa nagkadaiyang ahensya sa gobyerno, sama nalang sa Department of Health (DOH), Department of Social Welfare and Development (DSWD), ug uban pa.
Kahinomdoman nga sa pagmando sa presidente, giklaro niini nga ang palisiya magamit sa pinili nga mga opisina ubos sa ehekutibo, dayun gipagawas sa Malacañang ang Memorandum Circular (MC) 114, nga naghatag dugang nga mga detalye sa pagpatuman sa direktiba, ug nag-ingon nga ang mando maglakip sa national government agencies, government-owned or -controlled corporations (GOCCs), local government units, constitutional bodies, state universities ug colleges, ug uban pang government instrumentalities.
Gawas sa gipamubo nga semana sa trabaho, gimandoan usab sa Presidente ang mga ahensya sa gobyerno nga pakunhuran ang ilang konsumo sa kuryente ug gasolina og 10 hangtod 20 porsyento.
Ubos sa memorandum, ang mga opisina sa gobyerno gimandoan nga ipadayon ang air-conditioning sa 24 degrees Celsius, nga midugang nga ang dili kinahanglanon nga mga suga ug elektronik nga kagamitan kinahanglan nga patyon panahon sa paniudto ug pagkahuman sa oras sa opisina.
