Gisugdan na sa Bureau of Fisheries and Aquatic Resources-Region VII (BFAR7) ang pagpang-apud-apod sa Fuel Assistance Card sa mga kwalipikadong mananagat sa rehiyon karong adlawa, Pebrero 3, 2026.
Sumala ni Joel Lutao, ang Focal Person sa Fuel Subsidy sa BFAR-7, ang pag-apod-apud sa Fuel Assistance Card katambabyayong niini ang Universal Storefront Services Corporation (USSC) diin sugdan kini sa isla sa Bantayan sa lalawigan sa Cebu.
Iyang gibutyag nga adunay kapin sa 5,000 ka mga kwalipikadong mananagat nga adunay mga bangkang de motor sa lalawigan sa Cebu ang makadawat niini, samtang sa lalawigan sa Bohol adunay kapin sa 4,000 ka mga mananagat nga sugdan sa pag-apod-apod sa Marso 3, 2026.
Matud ni Lutao, tumong sa paghatag sa tabang pinansiyal nga nagkantidad og ₱3,000.00 nga matabangan ang mga mananagat nga makapadayon sa ilang panginabuhi taliwala sa pagsaka sa presyo sa gasolina.
Samtang ang schedule sa pagpahigayon sa Fuel Assistance Card distribution sa nagkalain-laing bahin sa lalawigan sa Bohol ug Cebu. Ingun man ang pagpahigayon og susamang aktibidad sa lalawigan sa Negros Oriental ug Siquijor, ipahibawo ra unya sa BFAR7 tungod kay gihan-ay pa ang petsa sa caravan, sumala ni Lutao.
