PROVINCE OF CEBU- Magdalit ang Kagamhanang Lalawigan sa Sugbo og fuel subsidy alang sa mga drayber sa habal-habal sa probinsya.
Gianunsyo kini ni Cebu Governor Pamela Baricuatro niadtong Miyerkules, Marso 25 atol sa pakighinabi niini sa mga sakop sa tigbalita nga nagtumong sa pag-alibyo sa kalisud sa sektor sa transportasyon karong panahon sa krisis sa gasolina.
Sumala pa sa gobernadora nga ang sugyot nga fuel subsidy para sa mga habal-habal kay psibleng magbalor sa P3,000 ngadto sa P5,000.
Makig-alayon ang Kapitolyo sa Sugbo ngadto sa mga Local Government Units (LGUs) sa tibuok probinsya aron sa pagsuta sa mga benepisyaryo ug ang pakig-negosasyon niini samga gasolinahan aron maoy muapod na sa distribusyon.
Sa inisyal nga pagpang-apod, adunay pagbana-bana sa kapin 5,000 ka mga drayber sa habal-habal ang mamahimong makapanghimulos sa fuel subsidy samtang gihan-ay pa ang detalye sa guidelines nga ipagawas.
