Gikondenar sa Foreign ministers sa G7 nations ang mga aksyon sa China nga nagbutang sa mga peligro sa kalig-on sa rehiyon, samtang nagpahayag og kabalaka sa mga paningkamot nga pahugtan ang kagawasan sa pag-navigate ug overflight pinaagi sa “puwersa” ug “pagpugos” sa South China Sea.
Kini ang gipadangat sa Declaration on Maritime Security and Prosperity sa G7 foreign ministers human sa ilang tigom sa La Malbaie, Canada karong semanaha.
Diin sa maong deklarasyon nga gikondenar ang ilegal, provocative, mapugsanon ug delikado nga mga aksyon sa China nga nagtinguha sa ‘unilaterally’ nga usbon ang status quo sa paagi nga mabutang sa peligro ang kalig-on sa mga rehiyon, lakip ang pinaagi sa pagbawi sa yuta, ug pagtukod sa mga outpost, ingon man ang ilang paggamit alang sa katuyoan sa military.
Gisupak usab nila ang unilateral attempts sa pagbag-o sa status quo, ilabi na pinaagi sa kusog o pagpamugos lakip sa East ug South China Seas.
Gipasiugda sa mga ministro ang importansya sa kagawasan sa paglawig ug overflight, nga nahimong mga lugar nga gikabalak-an sa Pilipinas taliwala sa panaglalis sa teritoryo niini sa China.
Gawas sa nangaging mga insidente sa pag-atake sa water cannon sa West Philippine Sea, niabot usab sa kalangitan ang tensiyon tali sa duha ka nasod.
Usa sa maong insidente nahitabo niadtong Pebrero, dihang ang usa ka Chinese helicopter milupad duol sa tulo ka metros sa ibabaw ug sa kilid sa usa ka eroplano sa Bureau of Fisheries and Aquatic Resources (BFAR) ibabaw sa Bajo de Masinloc o Scarborough Shoal.
