Narekober ang P6.8 milyon nga balor sa gituhuang shabu gikan sa usa ka job-order garbage truck driver sa Lungsod sa Consolacion atol sa gipahigayong buy-bust operation sa mga sakop sa PDEA 7, Cebu City Police Office Station 9, PNP Drug Enforcement Group – Special Operation Unit 7, Cebu City Police Office – City Drug Enforcement Unit, ug Naval Intelligence and Security Group sa Sitio Sobostiha II, Barangay Kalunasan, Dakbayan sa Sugbo, sa alas 4:02 sa hapon, niadtong Agosto 16, 2026.
Giila ni PDEA 7 Regional Director Joel B. Plaza ang nadakpan nga si alyas “Makmak”, 39-anyos, kinsa nagpuyo sa Barangay Pulpogan, Consolacion, Cebu, ug nagtrabaho isip usa ka job-order nga drayber sa Garbage truck.
Nakuha gikan sa suspek ang usa ka pakete sa shabu nga motimbang og hapit 1,000 ka gramo ug nagkantidad og P6,800,000, buy-bust money, usa ka smart phone, ug uban pang non-drug evidence.
Sumala sa taho, nagagikan sa usa ka confidential informant ang impormasyon bahin sa ilegal nga gihimo sa suspek, hinungdan nga gipaubos kini sa usa ka buwan nga case buildup sa wala pa gilusad ang operasyon. Nasayran usab nga makahimo ang suspek sa pag-aplay ug pagbaligya sa mga 300 hangtod 500 ka gramo sa shabu matag semana.
Dili na kini ang unang higayon nga nadakpan ang suspek tungod kay nadakpan na kini niadtong tuig 2015 tungod sa paglapas sa Section 5 ug 11 sa RA 9165, apan na-dismiss ang maong mga kaso.
Sa pagkakaron, ang nakumpiskar nga ebidensya gidala na sa PDEA 7 Regional Office Laboratory alang sa proper disposition samtang ang suspek temporaryong giprisohan sa pasilidad sa PDEA 7 sa Dakbayan sa Sugbo.
Mag-atubang siya og kasong paglapas sa Section 5-Sale of Dangerous Drugs, Article II sa RA 9165, nga adunay silot nga reclusion perpetua ug multa nga hangtod sa P10 milyon.
