CEBU CITY – Gitawag ni Cebu City Mayor Tomas Osmeña nga ‘Queen of Swertres’ si Cebu City Police Office Director Police Colonel Royina Garma.
Sa pakighinabi sa Bombo Radyo Cebu kang Mayor Osmeña, wala kini pagduha-duha nga mipasangil niPolice Col. Garma nga protektor sa illegal gambling ug mudawat og usa ka milyon pesos matag semana niadtong hepe pa kini sa CIDG-7, ug karon nga hepe kini sa CCPO nga midawat kini og 500,000 hangtud 800,000 pesos matag adlaw.
Matud ni Osmeña nga dili ang mga tao ang gi-protektaran sa kapulisan inay ang ilang mga bisyo.
Kini ang nahimong pamahayag sa mayor human nga migawas ang iyang hulagway sa social media nga naa kini sulod sa casino ug giingong mga pulis ang nagbuhat niini.
Samtang padayon usab nga gipasanginlan ni Mayor Osmeña ang kapulisan sa sunod-sunod nga pagrapido sa mga opisyal nga iyang kapartido.
Nasayran nga human ang nahitabong strafing sa business showroom ni Cebu City ABC President Franklyn Ong niadtong Sabado sa kaadlawon, girapido usab ang balay ni Amor Cabiles, ang Cebu City Barangay Mayor’s Office head ug solid Osmeña supporter niadtong Sabado sa gabii.(SBR)
