METRO MANILA-Gibasura sa Department of National Defense (DND) ang hangyo sa kampo ni Pastor Apollo Quiboloy nga ibutang sila sa pasilidad sa militar inay sa PNP.
Si Quiboloy, uban nila ni Jackielyn Roy, Ingrid Canada, Cresente Canada ug Sylvia Cemanes, anaa sa kustodiya sa PNP sa Camp Crame sukad niadtong miaging semana.
Gahapon, niduso og motion si Atty. Israelito Torreon ang legal counsel ni Quiboloy alang sa mosyon sa pagbalhin sa kustodiya ngadto sa AFP.
Ang tigpamaba sa DND nga si Arsenio Andolong niingon nga ang pasilidad sa AFP dili mao’y haom nga ahensya alang sa kustodiya sa mga suspek sa maong kasong kriminal.
Samtang, giklaro ni Torreon nga wala’y kalabutan o partisipasyon si kanhi Presidente Rodrigo Duterte sa pagsurender sa iyang kliyente.
Matod ni Torreon, kalit lang ang mga panghitabo ug wala diha ang kanhi presidente atol sa tibuok proseso.
Apan giangkon niini nga adunay mga opisyal nga naghatag og dalan alang sa malinawon nga pagsurender sa lider sa KOJC.
