CEBU-Nakahatag ug kabalaka sa kadagkuan sa Sugbo ang dili maayong panahon sa niaging mga adlaw sa pagpahigayon sa 2023 Sinulog Grand Parade sa bag-ong venue niini sa dakbayan sa Sugbo ang South Road Properties (SRP).
Apan si City Councilor Phillip Zafra nipasalig, nga ang grand parade, ang unang kalihokan sa Sinulog sulod sa duha ka tuig, ipadayon sa SRP karong Domingo, Enero 15.
Dugang pa ni Zafra, kinsa ang committee on peace and order chairman, nga ang presidente sa Sinulog Foundation nga si Ricky Dakay nipasalig kaniya nga mahuman na ang pagtukod sa entablado nga gamiton sa ritual showdown sa katapusan ning semanaha.
Apan matud pa ni Zafra nga kung magpadayon ang pag-uwan o kung adunay bagyo ug dili na maagian ang palibot sa entablado ug ang agianan sa parada tungod sa lapok unya ipatuman nila ang “Plan B,” nga mao ang pagbalik sa orihinal nga rota nga maoy motadlas sa Osmeña Boulevard paingon sa Cebu City Sports Center.
Giangkon sa konsehal sa dakbayan nga nag-atubang sila og hagit sa pag-andam sa bag-ong venue ilabi na sa dili maayong panahon, apan iyang gipasalig nga andam ang tanan sa takna sa labing dako ug engrande nga kapistahan sa Sugbo.
