Nakaagom og duha ka sunod-sunod nga kapildihan ang Gilas Pilipinas Women sa pag-abli sa ilang kampanya sa FIBA 3×3 Women’s World Cup didto sa Warsaw, Poland.
Sa ilang unang sangka sa Pool C, napildi ang pambansang koponan batok sa Latvia, 11-14.
Sayong nakabentaha ang Pilipinas, 5-2, apan daling nabalit-ad ang dula human mopahamtang ang Latvia og dominanteng 12-1 run.
Misulay pa og gukod ang Gilas aron mapahak ang biya ngadto sa 13-10, apan nakuwangan na sa oras.
Wala gihapon suwerteha ang Gilas sa ilang ikaduhang dula human sila liyukan sa mas dako ug No. 6 seed nga Team Germany, 10-22, diin hingpit nga gidominar ang tibuok kumbati.
Tungod sa maong 0-2 nga baruganan, ang Pilipinas kasamtangang naghupot sa pinakaubos nga dapit sa Pool C.
Mosuway og pamawi ang Gilas karong adlawa, Hunyo 3, batok sa mas bug-at nga mga kaatbang nga mao ang China ug Italy alang sa pagpadayon sa elimination round.
