Nipagawas og travel advisory ang gobyerno sa Australia aron pagpahinumdom sa mga lungsuranon niini nga mag-amping sa pagbiyahe paingon sa Pilipinas, ilabi na padulong sa Mindanao.
Kini tungod usab sa giingong ‘security risk’ sa rehiyon, sama sa mga hulga sa terorismo ug sunod-sunod nga kapintasan.
Ang advisory nagpahayag nga ang hulga sa mga demonstrasyon ug sibil nga kagubot nagkadaghan tungod sa sunod-sunod nga mga panghitabo.
Tungod niini, ang gobyerno sa Australia nagpahinumdom sa mga lungsuranon niini nga likayan ang pagtambong o pag-apil sa mga protesta ug dagkong mga panagtapok tungod kay mahimo silang mapintas.
Nagpasidaan usab kini sa posible nga mga hulga sa transportasyon ug hinungdanon nga mga serbisyo, busa gitambagan nga sundon ang giya sa lokal nga awtoridad.
Gihatagan usab og gibug-aton sa advisory nga adunay hulga sa pag-atake sa mga pampublikong lugar sama sa mga hotel, shopping mall, restawran, simbahan, ug uban pang dagkong mga lugar nga turista.
Lakip sa mga lugar nga partikular nga giila mao ang sentral ug kasadpang Mindanao, lakip ang Zamboanga Peninsula, Sulu, ug ang Southern Sulu Sea diin gikataho nga taas ang hulga sa terorismo ug kidnapping.
